Annað mannamálsblogg
Ég dustaði rykið af blogginu mínu eftir mörg ár. Ástæðan var reyndar sú að ég átti að skrifa blogg á mannamáli í tengslum við verkefni sem ég er að vinna í náminu.Mér fannst satt að segja afar snúið að skrifa menntablogg á mannamáli, sem þýðir að málfarið má ekki vera á ,,uppskrúfuðu fræðimáli“. Ég átti sem sagt að fjalla um ritrýndu greinina sem ég valdi, setja upplýsingar um hana á mannamál og tengja við fræði, með tilvísunum.. en samt átti þetta ekki að vera fræðilegt. En hér er önnur tilraun.
Þá er það greinin
Ég gerði tilraun til að skrifa ,,blogg“ á mannamáli, en ég held að það þyki ekki vera gott ,,mannamál“. En hér ætla ég að gera aðra tilraun.
Greinin sem ég valdi mér heitir Initiating conversations and opening doors: How principals establish a positive building culture to sustain school improvement efforts. Ég reyndi að þýða heitið yfir á íslensku sem var svona: Að hefja samtöl og opna dyr: Hvernig skólastjórar koma á jákvæðri menningu til að viðhalda umbótastarfi skóla. Fjallar hún um rannsókn sem gerð var í Bandaríkjunum. Rætt var við fjóra skólastjóra sem þóttu hafa staðið sig afar vel með innleiðingu breytinga í þeim skólum sem þeir stýrðu. Um var að ræða breytingar á aðalnámskrá eða reglugerð sem allir skólar þurftu að innleiða. Ákveðið var að skoða hvað það væri sem þessir fjórir skólastjórar gerðu betur en aðrir. Í stuttu máli kom í ljós að það sem var sameiginlegt hjá þessum fjórum skólastjórum, var að þeir lögðu sérstaka áherslu á:
- gagnkvæmt traust meðal starfsfólks
- að kynnast starfsfólkinu sínu vel
- að taka þátt í faglegum og markvissum samskiptum.
Menningin og traustið.. það skiptir máli
Út frá þessum niðurstöðum þykir mér áhugavert að velta fyrir mér hver menningin er í skólum sem leggja áhersla á þessa þætti. Hún hlýtur að vera góð og mikið lagt upp úr að starfsfólki líði vel og rými og tími skapað til að fólk njóti samveru hvert með öðru og einnig að fólk læri hvert af öðru. Það þarf að huga að lærdómsmenningunni, hún verður ekki til af sjálfu sér og þar gegna skólastjóri og aðrir skólastjórnendur lykilhlutverki.
Skapa þarf menningu sem byggir á þeim gildum og normum að
traust sé lykilþáttur í öllu samstarfi, en það
tekur tíma og orku. Það tekur langan tíma að
byggju upp traust, en það getur brostið á einu augabragði. Þess vegna þarf hver
og einn að leggja sig fram um að vanda samskipti sín og þar eru stjórnendur
fyrirmyndir.
Hvað geri ég við þetta!
Í þessu sambandi velti ég sjálfri mér fyrir mér sem stjórnanda. Hvað ég get gert betur til að skapa traust? Eftir því sem ég les meira þá sé ég hvað það er mikilvægur eiginleiki að vera einlægur og auðmjúkur. Þetta eru þættir sem þarf að hafa í huga á hverjum degi, oft á dag. Skoða sjálfan sig í ólíkum aðstæðum og velta fyrir sér sambandi sínu við ólíka einstaklinga. Við förum nefnilega í ótal hlutverk á hverjum degi, eftir því við hvern við eigum samskipti við og þess vegna er áhugavert að skoða sig í því samhengi. Hvers vegna fer ég í þetta hlutverk þegar ég hitti þennan einstakling?
Þetta eru hugleiðingar mín í tengslum við menntabloggið mitt.
Ummæli